‘Premature’ para ken ni dati a Magdalo Partylist Rep. Gary Alejano iti nasapa a panangiwaragawag ni Ombudsman Jesus Crispin Remulla iti panangiruar ti International Criminal Court iti warrant of arrest kontra ken ni Senador Bato Dela Rosa.
Iti pannaki-uman ti Bombo Radyo Vigan ken ni Alejano, dayta nga addang ni Remulla ket arigna naikkan gundaway ni Dela Rosa nga aglemmeng agsipud ta kadagitoy a panawen ket saan payen a sumsumrek iti trabahona iti Senado.
Patien ti dati a kongresista a nasaysayaat no makemmeg nga umuna ti senador, maipakita kenkuana ti warrant of arrest sakbay a mairuar ti publiko a pakakitaan a pudno a napasamak ti pannakakemmegna.
Nupay kasta, kinunana a paset latta daytoy ti proseso ti ICC a mangdusa kadagiti nainaig iti crimes against humanity.
