Target ti Department of Health (DOH) a mabakunaan ti mapattapatta a 2.007 a milion nga estudiante iti Grade 4 ken Grade 5 manipud kadagiti publiko ken pribado a pagadalan kontra iti Human Papillomavirus (HPV) iti sidong ti programa a Bakuna Eskwela.
Inlawlawag ni DOH Epidemiology Bureau Director Alethea de Guzman a siam a porsiento kadagiti target nga estudiante ti mapattapatta nga out-of-school youth, idinto a karaman pay iti tinawen a programa dagiti bakuna kontra kamuras, rubella, tetanus ken diphtheria.
Segun ken ni De Guzman, nakairekord ti Pilipinas iti 7,829 a kaso ti cervical cancer idi 2022 ken indagadagna kadagiti nagannak ken guardians a mangala iti umiso nga impormasion tapno mapalubosan dagiti annakda a makaawat iti HPV vaccine.
Insingasing ni Rizal Medical Center Specialty Center Head Nelinda Catherine Pangilinan ti pannakairaman ti reproductive health iti basic education curriculum tapno mapalawa ti pannakaammo dagiti agtutubo iti self-care ken prevention ti cervical cancer, kalpasan dagiti nairekord a kaso kadagiti pasiente nga agtawen iti 20.//via Bombo Cyrelle Ann Rosario
