VIGAN CITY – Nagpalawag ni dati a Sinait Mayor Glenn Guzman iti panangkwestyon ni Vice Mayor Clifford Inez kenkuana mainaig ti pondo a naaramat a pangtulong kadagiti kailianda a naapektaran iti community quarantine gapu iti COVID19.
Dayta ket gapu ta napagtutulaganda idi kallabes a ti 6.3 a milyon a calamity fund iti ilida ti aramatenda a pangtulong kadagiti umili ngem no apay a ti national fund ti naigasto.
Segun ken ni Guzman, immun-una a ginastoda ti walo a milyon a pisos a naggapu iti national government nga isu ti ingatangda kadagiti bagas ken grocery a maipaay kadagiti umili sakbay a ti 6.3 a milyon a calamity fund iti nasao nga ili agsipud ta no saan a magastos amin ti pondo iti salinong ti Bayanihan to Heal As One Act sakbay a malpas iti COVID19 ket maisubli iti gobierno.
Gapu iti dayta, inkalintegan ti dati a mayor a nangirserbada laeng iti pondo nga aramatenda no kas man bilang saanto pay laeng a nalpas ti krisis a sangsangwen ti pagilian tapno adda met la maaramat tapno saan a marigatanto manen dagiti kailianda.
