VIGAN CITY– Saanen a nasdaaw iti maysa nga agpanpanday linteg iti panang-apprubar ti Kongreso iti pannakapaatiddog ti Martial Law agingga inton Disyembre 31, 2017.
Segun kenni Magdalo Partylist Rep. Gary Alejano, nakadkadlawen a nagbalin a paspasurot dagiti sumagmamano nga agpanpanday linteg tapno matungpal iti kayat ni Presidente Rodrigo Duterte tapno saan nga isuda iti pagpupudutan iti administrasyon.
Innayonna a no ti krisis idiay Marawi City iti pagsasaritaan ket atiddog unay ti lima a bulan nga extension ti Martial Law ngem no iti krisis iti intero a Mindanao ket saan nga umanay.
Inpaganetget ti agpanpanday linteg a kabaelan ti militar a parmeken dagiti terorista uray no awan ti martial law ta kumpleto dagiti gamit ken panagsanay dagiti suldado.
Namnamaen ni Alejano nga awan iti malabsing a human rights kadagiti operasyon ti militar.
