VIGAN CITY – Pinasingkedan ni Commission on Human Rights Spokesperson Atty. Jacqueline de Guia a dakkel a tulong iti imbestigasyon iti pannakaala iti video iti pasamak a pammaltog ti maysa a pulis iti agina idiay Paniqui, Tarlac idi Domingo.
Iti pannaki-uman ti Bombo Radyo Vigan ken ni de Guia, ti nasao a video a nagwaras iti social media ket nangriing ti publiko ken gobierno kadagiti banag a rumbeng a masimpa.
Ngem nupay nakatulong ti video ket makapadanag iti nasao nga insidente ta napasamak iti pammaltog iti kaaduan a tao, baket ti maysa a biktima ket saanda nga armado, saan a self-defense iti napasamak ti pulis ken ti natamaan ket ti ulo dagiti biktima.
Inyunay-unayna ti publiko a saanda nga iraman ti ubing a putot ti suspek ta rumbeng a dayawenda latta iti karbenganna ket inlawlawagna a mabaliwan pay iti galadna babaen iti pannakaidalanna iti psychosocial intervention.
Kabayatanna, kiniddawna pay a saanen nga iwaras pay iti rupa ti ubing kasta pay iti nagan ken dadduma pay nga impormasyon kenkuana ta posible a maapektaran iti masakbayanna.
