VIGAN CITY-Natalek ni Isabela congressman Rodito Albano a sakbay a malpas ti session idiay Kongreso ket maapprubaran idiay Kamara ti inpilan a gakat tapno mapagbalin a legal ti marijuana kalpasan nga inaklon a mismo ni House Speaker Gloria Macapagal Arroyo nga agus-usar isuna ti marijuana-based pain patch no adda iti sabali a pagilian gapu iti panagsakit ti cervical spine na.
Ti exclusive interview ti Bombo Radyo Vigan, kinuna ni Rep. Albano a dagiti laengen nakasara ti panagpanpanonot na ti mangkontra ti “medical marijuana” ta agingga ita ket saan da pay laeng a maawatan ti kinapateg ti ited na a benepisyo kadagiti agsagsagaba ti nakaro a sakit.
Ti agdama ket addan iti maikadwa a pannakaibasa na ti House Bill No 6517 wenno Compassionate And Right Of Access To Medical Cannabis Act nga inpila ni Albano.
Maipalagip a pimmigsa pay ti kampanya ti medcial marijuana kalpasan a pinaboran ni Miss Universe 2018 Catriona Gray no laket di para iti panagagas laeng.
