Kinabartek ti rason a makitkita dagiti pannakabagi ti linteg no apay a tinagbat ti maysa a lalaki ti kinainumanna idiay Sitio Cawag, Barangay Aluling, Cervantes, Ilocos Sur.
Nabigbig ti biktima a ni Francis Inali Tengedan, agtawen iti limapulo ket innem, mannalon, agnaed iti nasao a lugar.
Ti met suspek ket ni Alyas ‘Balsoto’ Soliken, agtawen iti uppat a pulo, taga-Bunga, Tadian, Mt. Province.
Iti pannaki-uman ti Bombo Radyo Vigan ken ni Police Captain Alden Isang, Chief of Police iti Cervantes, agbarkada ti suspek ken biktima ngem gapu iti saanda a pagkinnaawatan ket natagbat ti suspek ti biktima a nagsagabaanna iti dunor iti rupa, ima, ken bakrangna.
Sakbay ti insidente, agin-inom ti suspek ken biktima kadua ni Zaldy Casion, agtawen iti tallopulo ket siam.
Nakaturog ni Zaldy agingga a nakangngeg iti ariwawa iti aglawlaw isu a nariing ket nakitana ti agsaysayasay a dara iti ulo ti biktima idinto a ti suspek ket nakaiggem iti buneng.
Dagus nga inanawana dagiti dua ket tinawaganna ti asawa ti biktima isu a naitaray iti ospital para iti pannakatamingna.
Kaso a frustrated homicide ti naipila kontra iti suspek.
