Kiniddaw ni Senador Francis “Kiko” Pangilinan ti naan-anay a transparency ti Department of Agrarian Reform wenno DAR iti panangilasin ken panangiwaras kadagiti benepisio kadagiti benepisiario ti agrarian reform, nangruna ta binilion a pisos ti kidkiddawen ti ahensia a pondo para iti 2027.
Kabayatan ti pannakadengngeg ti Senate Committee on Finance iti singasing ti badyet ti DAR, kinuna ni Pangilinan a kasapulan a nalaka a ma-verify ti publiko dagiti benepisiario, proyekto, pasilidad ken negosio a suportado ti ahensia.
Karaman iti kiddawna ti panangikabil kadagiti geotag kadagiti proyekto, pananglukat kadagiti kontrata ken,procurement documents, independent inspection ken panangiruar iti impormasion a mangpaneknek nga aktual nga adda ken agtartrabaho dagiti proyekto a pinunduan ti gobierno.
Segun kenni Pangilinan, napateg dagitoy a mekanismo tapno masigurado a nalawag ti resulta ti tunggal pisos a mailatang para iti agrikultura ken mapan kadagiti mannalon a rumbeng a magunggonaan.
