VIGAN CITY – Pinasingkedan ni Atty. Edwim Concepcion a saan a mabalin a maipatungpal ti innebbetan a sarita ni Presidente Rodrigo Duterte a kemmegen dagiti saan pay nabakunaan nga umili.
Iti pannakiuman ti Bombo RAdyo Vigan kenni Atty. Concepcion, saan a valid ti inbaga ti presidente ken inyunay-unayna nga adda ti karbengan ti tao nga agliklik nu saanda a kayat ta awan pay ti naipatungpal a linteg a mangbagbaga a mandatory ti panagbakunan.
Innayonna nga uray agbalin a linteg ti nasao a banag ket masapol a maipakaammo pay nga umuna iti publiko sakbay a maiyaplikar ken iyuray a makacomply ti tattao tapno awan ti maabuso.
Innayon met ni Atty Ronnie Rapanut iti pannakipatpatang kenkuana iti Bombo Radyo Vigan a masapol a maibasar iti maysa a linteg ti maaramid nga addang weno tignay ta inyunay-unay na a saan a legislator ti Presidente ta maysa isuna a Chief executive a mangipatungpal laeng ti linteg nga inaramid ti Kongreso.
Innayonna a nu ipatungpal dagiti agpanpanday-linteg ti inbaga ti presidente, maibilangton nga illegal dagiti aramidenda ta awan ti pagibasaran a linteg nu maipatungpal.
