VIGAN CITY – Inbilinen ti Department of Agriculture a masurot iti usto a protocol inaig iti usto a panangpatay wennu panangidispose kadagiti baboy a naapektaran iti saan pay nga ammo a sakit dagiti dingwen, nangruna idiay Antipolo, Rizal.
Ti pannaki-uman ti Bombo Radyo Vigan, inbaga ni Agriculture Secretary William Dar a binagbagaan nan dagiti tao na nga adda iti ground zero command a suruten da iti usto a protocol iti panangpatay kadagiti baboy kasaruno dagiti reklamo a naawat da manipud kadagiti sumagmamano nga agindeg idiay Barangay Cupang, Antipolo inaig iti mapapati a panangisako dagiti otoridad kadagiti nagsakit a baboy, sa da inkali iti abot ket ginaburan da iti daga babaen ti backhoe.
Malaksid iti dayta, inbilin payen iti opisyal iti panangpainget ti quarantine operations kadagiti lugar nga adda dagiti natay a baboy gapu ti saan pay nabigbig a sakit.
Inpasigurado na nga adda iti tulong nga ipaay ti ahensya kadagiti agtartaraken nga adda iti matay a baboy da ta makaala da ti tallo ribo a pisos a cash assistance, sabali laeng dagiti buryas a maited to kadakuada nu nadalusanen iti lugar da kadagiti virus a mangitunda iti sakit dagiti baboy.
