Inkari dagiti lider ti kamara a papigsaenda ti panangimaton ti Kongreso inton tawen 2025, a mangipamaysa iti transparency, accountability, ken nasayaat a panagturay.
Segun ken ni Deputy Speaker ken Quezon Representative David Suarez nga iti panangidaulo ni Speaker Ferdinand Romualdez ket agtultuloy nga usaren ti Kamara dagiti review functions na para iti pagsayaatan ti pagilian.
Karaman kadagiti nabiit pay nga imbestigasion ti illegal Philippine Offshore Gaming Operators (POGO) ken koneksionda iti illegal drug trade, money laundering, ken extrajudicial killings, kasta met ti suplay ken presio ti bagas.
In-review pay ti Kamara ti pannakausar ti pondo ti publiko, ken ti makapadanag a panaggasto iti Office of the Vice President ken Department of Education ti confidential funds.
Inlawlawag ni House Majority Leader Manuel Dalipe a napateg dagitoy nga imbestigasion ken hearing para iti epektibo a panagaramid iti linteg ken mangipakita iti panagkumitda a mangpennek kadagiti kasapulan dagiti Pilipino.
Innayonna a napateg dagiti imbestigasion ti komite tapno mapasayaat ti panagturay ken makaaramid kadagiti addaan kaipapanan a polisia.
