Nagballaag ti Philippine Commission on Women kadagiti nainaig iti cheating wenno pananglokloko iti asawa wenno kaayan-ayat.
Segun ken ni PCW Chairperson Ermelita Valdeavilla, maysa a klase ti psychological abuse iti pannakikamalala ken adda maipatpatungpal a jurisprudence wenno desisyon ti korte a nangdeklarar iti pananglokloko ken pannakikamalala kas maysa a klase ti panagabuso iti kapanunotan ti naloko wenno biktima.
Ngem dayta masapul a mapatibker babaen ti panagreklamo wenno panagipila iti korte ti kaso tapno mapapigsa ti pannusa kontrakadagiti manglokloko nga asawa wenno kaayan-ayat.
Segun ken ni Valdeavilla, awan ti rumbeng a pagbutngan dagiti biktima ta gender sensitive dagiti polis ken korte isu a masigurado a ti sentensyada wenno pangngeddeng kadagiti reklamo ket patas ken awan ti maan-anamungan a gender.
Binalakadan ti opisyal dagiti makarikrikna ti cheating wenno pananglokloko ken dadduma pay a klase ti panagabuso nga isalakan ti bagi, agreklamo kadagiti otoridad ken padasen a mangrugi manen iti baro a biag manipod pannaka-abuso.
