Kinondenar ni Sen. Raffy Tulfo ti inyulog ti Pasig Regional Trial Court a temporary restraining order (TRO) a mangpasardeng pay laeng iti pannakaipatungpal ti P85 daily minimum wage hike iti Metro Manila nga impila ti Readycon Trading and Construction Corporation ken R-11 Builders, Inc.
Segun ken ni Tulfo, maikontra daytoy iti Article 126 ti Labour Code, a mangiparit kadagiti korte nga agipaulog iti TRO kontra iti inaramid dagiti Regional Wage Boards.
Insingasing ti senador a maipan koma ti apela iti National Wages and Productivity Commission (NWPC).
Kinunana pay nga apektaran ti TRO ti pagsapulan dagiti mangmangged, isu a mangipila iti gakat a manglawlawag ken mangbalbaliw iti probision ti Labour Code mainaig iti pannakaipatungpal ti wage hike.
