Saan pay laeng a siento porsiento a masigurado a makastrek kas state witness ni dati a Bulacan 1st District Engineer Henry Alcantara mainaig kadagiti anomalya iti flood control project numan pay insublinan iti gobierno ti P110-M, segun iti maysa a rockstar lawyer.
Iti pannaki-uman ti Bombo Radyo Vigan ken ni Atty. Carlo Ybanez, uray no saan a masigurado ket maibilang a nasayaat nga addang daytoy ni Alcantara ta isu ti pagilasinan nga agbabawi kadagiti madi nga inaramidna.
Gapu dayta ket mabalin a maibilang a positibo daytoy a punto iti aplikasionna kas state witness.
Numan bilang ta ti panangisubli ni Alcantara iti nasao a gatad ket paset iti patanganda iti Department of Justice, ibilang a legal ni Ybanez agsipud ta mabalin a mangituding ti nasao nga ahensia iti ania man a kondision tapno makastrek kas state witness ti maysa a tao no la ket resonable ti kondision.
Kabayatanna, binabalawna met dagiti Discaya gapu iti panagpammarangda a biktima iti nasao a kontrobersia.
Kinuna ni Ybanez a kayat dagiti agassawa a maibilangda kas state witness ngem saanda met a kayat ti agisubli kadagiti gatad a naawatda.
