VIGAN CITY – Natalna ken awan pay laeng ti riribuk a mapaspasamak idiay Moscow, Russia malaksid laeng ti panag-protesta dagiti Russian a mangipampanawagan iti panangisanud ti Russia iti panangsakupda iti Ukraine
Iti pannaki-uman ti Bombo Radyo Vigan ken ni Bombo International Correspondent Danilo Casallo, patienna a husto laeng ti addang ni Russian President Vladimir Putin a mangala manen iti Ukraine kas partena ta maymaysa met laeng iti kultura ken pagsasaoda, isu a ti pannakipaset ti Ukraine iti North Atlantic Treaty Organization(NATO) ket pangta kadakuada.
Para ken ni Casallo, saan a sakup ti maar-aramid ita idiay Ukraine no di ket kayat laeng t Russia a pasublien ti Ukraine kas kaalyadoda ngem gapu ti mapaspasamaken a rinnupak, dakkel ti bimmabaan ti kuarta ti Russia isu a bumaba met ti sueldoda.
Innayonna a mabalina nakarkaro a rinnupak ti mapasamak no mapan umarayat ti pwersa ti Amerika ken dadduma pay a pagilian ta napalawlawanen iti pwersa ti Russia idiay Ukraine isu a saanda a makastrek iti mismo a kabisera ti Kyiv.
Nupay kasta, paspasungadanda met ti posible a pannakalpas ti riri iti nagbaetan ti Russia ken Ukraine ta mapapati a kayat met laeng ni Ukrainian President Volodymyr Zelensky iti makikapia ken ni Putin.