Mamati ti Malakanyang a paset ti diskarte ti House Prosecution ti panagsango iti kontrobersial a ni Mary Grace Piattos kas testigo.
Daytoy ti reaksion ti Malakanyang kalpasan a kumpirmaran ni House prosecutor ken Manila Representative Joe Chua a maysa ni Piattos iti duapulo ket lima a testigo a maipasango iti impeachment trial ni Vice President Sara Duterte, partikular iti isyu ti confidential funds.
Segun ken ni Palace Press Officer Atty. Claire Castro, adda iti prosekusyon ti decision no sino dagiti maipasango a testigo iti kaso.
Pinasingkedan ni Castro a paset iti estratehiya ti prosekusyon ti nadakamat nga addang.
Nupay kasta, dinakamat ti palace official a basar iti datos ti Philippine Statistics Authority nga awan ti aniaman a rekord ti nagan a Mary Grace Piattos, isu a posible a marigatan a maammuan ti nadakamat nga indibidwal.
