VIGAN CITY – Itultuloy ti National Irrigation Administration iti panangtakuat kadagiti dadduma pay a mabalin a partuatenda a paggapuan ti danum a makatulong kadagiti mannalon.
Segun ken ni NIA Spokesperson Manny Luczon, paset iti solar pump irrigation project ti ahensia ti panangipaay iti solar pump wenno ti makina a paandaren ti darang ti init.
Limitado iti lima nga ektarya ti kabaelan a mapadanuman ti kada solar powered-machine.
Nupay kasta, kitkitaendan dagiti benepisyaryo a maikkan ken dagiti lugar a saan a mabembenipisyaran kadagiti agdama nga irrigation facilities ti NIA.
Malaksid dayta, karaman pay kadagiti ipangpangrunada ti Executive Order 138 wenno ti Full Devolution of Certain Functions of the Executive Branch to Local Governments, Creation of a Committee on Devolution, and for other purposes a pinermaan ni Presidente Rodrigo Duterte.
Gagem ti nasao nga addang a dagiti communal irrigation system ket isu ti yallatiwda iti karbengan a mangpasimpa ken mangpasyaat kadagiti LGUs.
Nakairugida metten iti devolution briefings kadagiti sangapulo ket siam nga ili iti probinsia – innem iti 1st District ken sangapulo ket tallo iti 2nd District.
