Pinasingkedan ti Malakanyang a dakkel a tulong kadagiti umili ti panangikkat ti Philippine Health Insurance Corporation iti 45-day benefit limit kangrunaan kadagiti dumaldalan iti hemodialysis.
Segun ken ni Palace Press Officer Usec Claire Castro, ti panangikkat ti Philhealth iti 45-day limit ket tapno masigurado a dagiti serbisyo ti ahensia ket awan ti lappedna.
Babaen iti 45-day benefit idi, mapalubosan dagiti Philhealth members iti maximum a 45 days of hospital confinement iti kada tawen ngem ita naikkaten, addan ti inclusive approach para kadagiti dadduma pay a medical services.
Iti met biang ni Philhealth Acting President and Chief Executive Officer Edwin Mercado, kayatda a dagiti Pilipino nga adda nakaro a sakitna wenno dagiti agkasapulan iti napaot a pannakayospital ket makaawat iti serbisyo a pangsalun-at a saandan a pakadanagan no mailumlomda iti utang.
