Maidurduron manen iti Senado ti gakat a panangdutok ti designated survivor a pangsiguradoen a saan a mabakante ti Office of the President nu kas bilang agkakadua dagiti nangangato nga opisyal iti gobierno ken agbalin a permanently disabled ti presidente ken ti constitutional successors-na.
Iti maidurduron a Presidential Succession Bill, mangdutok ti presidente ti maysa a miembro ti gabinete a maipan iti nalimed ken natalged a lugar a bantayan ti Presidential Security Group.
Ti nasao a designated survivor ket miembro ti gabinete nga isu iti agakem a presidente nu natay, nagbalin a disabled wenno naggigiddan a naawan iti puesto ti presidente ken aminen a nangangato nga opisyal gapu iti terrorist attack, major calamity ken dadduma pay a saan a namnamaen a pagteng.
Ti panagakem nga acting president ket agingga masukatan ti mabotosan a presidente iti eleksyon a maaramid iti uneg iti siam a pulo nga aldaw manipod nagtakem.
Maibasar iti konstitusyon ti line of presidential succession ket vice president, senate president ken speaker of the house.
Ngem nu aminda ket naawan ket sumaruno ti linya ti pinaka-senior ti senador, pinaka-senior a kongresista ken sumaruno ti designated survivor.
