Pinasingkedan ti maysa a political analyst a nasken ti agannad iti panagisawang kadagiti balikas nga adda pakainaiganna iti pangta a panangipabanto iti ania man nga armas iti pagilian.
Kasaruno dayta iti panangdakamat ni Senador Imee Marcos nga adda mapapati a hypersonic missile ti China a posible a maipabanto kadagiti 25 a lugar a targetda.
Iti pannaki-uman ti Bombo Radyo Vigan ken ni Atty. Edward Chico, mabalin a mangitunda iti nadagdagsen a tensyon ti inaramid ti senador nangruna ta saan met a mailibak nga iti agdama ket adda saan a pagkinnaawatan iti mapagin-innagawan a teritoryo iti West Philippine Sea.
Numan pay saan met a nasken nga yaleng-aleng dagiti kastoy a banag, kinuna ni Chico a masapul nga adda nalawag nga impormasyon ken makikammayet tapno maamuan ti kinapudnona.
Innayonna a saan nga insigida a makaisayangkat iti kastoy a panagraut ti maysa a pagilian gapu ta nagastos iti pannakirinnupak.
Numan bilang met pudno dagiti imbaga ti senador ket kunana a nasaysayaat no maadal a nalaing ti naggapuanna tapno makasagana ti pagilian iti addang a mabalinda nga aramiden.
