VIGAN CITY – Maisayangkat ti panangdadael wenno pananguram dagiti walopulo ket siyam a pakete ti nakumpirmaran a high grade shabu inton July 8 idiay Caoayan babaen ti pannakaimatang dagiti maseknan nga ahensia, kameng ti media, manggalap a nakapidot ti shabu, ken dagiti tallopulo ket uppat a mayor ti probinsia, tapno makita nga awan iti kurang ken saan a nasukatan ti tawas dagiti droga.
Iti pannaki-uman ti Bombo Radyo Vigan ken ni Ilocos Sur Provincial Board Member Efren Rafanan, Chairman ti Committee Peace and Order Acting Governor, maipanakkelna dagiti kinapundno dagiti mangngalap ti Probinsiya, ta uray ammoda a million iti gatad dagiti nasarakanda a shabu ket insurrenderda daytoy kadagiti otoridad.
Segun ken ni Rafanan, posible nga intinnag ti maysa a barko dagiti shabu iti kabaybayan.
Inyunay-unay na pay a tapno saan a maallukoy dagiti mangngalap a mangilako ti shabu kadagiti sindikato a kasukat ti dakkel a gatad ti kuarta, inkeddengda nga inton July 5 ti deadline a mai-turn over dagiti narekobre a shabu tapno makaawatda iti gunggona a Php50,000 incentive, ken P5,000 tunggal pakete ti shabu nga aggapu met ti Philippine Drug Enforcement Agency.
Kabayatanna, crematorium iti mausar tapno puoran ken dadaelen dagiti droga.
