Impaganetget ni Sen. Francis Kiko Pangilinan ti kasapulan nga insigida a pannakapasa ti Senate Bill 1547 a mangyetnag ti Justice Reform Committee iti baet ti kumarkaru a rurod iti publiko gapu iti pannakapaay a maibalud dagiti opisyal a karaman iti kaso ti korapsyon.
Segun ken ni Pangilianan, marikna unay iti panawagan dagiti umili para iti pudno a dusa.
Kinunana a dagiti iskandalo ti korapsyon ket nalawag nga ehemplo no kasano a nagresulta iti takaw a pondo ken sistematiko a pagkurangan iti gobierno iti nakaru a layos, pannakadadael dagiti pagtaengan ken pannakalugi dagiti pagbiagan.
Kas chairperson ti Senate Committee on Justice and Human Rights, madanagan ni Pangilinan iti agtultuloy a panagkaru ti high-level corruption ken arigna awan iti madusdusa.
Iti salinong ti linteg, mangisayangkat ti komisyon ti nakaru a panagadal kadagiti lima nga adigi iti justice system nga isu ti law enforcement, prosecution, judiciary, correctional system ken umili.
Gagemda nga amwen ni apay a bumunbuntog dagiti kaso kontra kadagiti opisyal ti gobierno, no apay nga adu ti backlog ken no apay nga agtultuloy a mapapaay ti pannakadusa.
