Nagpanawagan ni Rep France Castro, Deputy Minority Leader ken Act Teachers Party-list representative, a maamyendaran ti Safe Spaces Act tapno maiparit dagiti “transphobic, homophobic ken sexist slurs.”
Kabayatan ti pannakadengngeg ti House Committee on Women and Gender Equality, kinuna ni Castro a rumbeng a mainayon dagiti nasao a balikas iti gakat kas panaglabsing iti linteg, agraman ti sexual harassment ken misogynistic remarks.
Ti panawagan ni Castro ket gapu iti panangawag ni Bise Presidente Sara Duterte kadagiti polis a “bakla”.
Segun ken ni Castro, maysa daytoy a panangbastos ken panangtagibassit iti LGBTQ community.
Patien ni Castro a ti pannakaamyendar ti Safe Spaces Act ket panawenen tapno ad-adda a madusa dagiti opisial ti gobierno wenno empleado a nairaman iti sexual harassment ken dadduma pay a klase ti panangabuso.
