Impaganetget ti mangidaulo iti National Parent-Teachers Association ti nasken a panangadaptar iti panawen imbes a kanayon a masuspenso ti klase.
Dayta ket iti baet ti mano nga aldaw a pannakasuspenso ti klase kadagiti nadumaduma a lugar iti pagilian gapu iti nangato a heat index.
Iti pannaki-uman ti Bombo Radyo Vigan ken ni Willy Rodriguez, saanen a mapukaw ti climate change wenno panagbaliw ti panawen isu a masapul a masaganaan ti panangpalawa kadagiti klasrum, panagbalon iti adu a danum, panagitugot iti payong ken panangiyakar iti oras ti serrek.
Inyunay-unayna a napateg a sumrek latta iti pagadalan dagiti ubbing kagiddan ti pannakabantay ti salun-atda ta saan unay nga epektibo ti blended learning a maipatpatungpal.
Patien ni Rodriguez a nasaysayaat latta no adda iti uneg ti pagadalan dagiti ubbing imbes a makita ida nga agayay-ayam, mapmapan iti mall wenno nakatutok laeng iti gadgets-da no addada iti uneg ti pagtaenganda tunggal awan ti serrek.
Kunana pay nga ipaiman ti desisyon a kadagiti principal ket saan a kadagiti mayor no bilang adda suspensyon iti klase wenno awan.
