VIGAN CITY – Nagpalagip ni Provincial Heath Officer Dr. Trina Tabboga Talaga kadagiti umili nga agannad kontra ti covid-19 babaen ti panangsurot iti minimum public health standard kalpasan a nanayunan manen ti kaso ti covid-19 iti Ilocos Sur.
Iti pannaki-uman ti Bombo Radyo Vigan ken ni Dr. Talaga, nanayunan ti tallo nga aktibo a kaso ta nga aldaw idinto nga idi kalman July 10, 2022 ket sangapulo ket lima iti nainayon ken adda pay ti maysa a pimmusay nga agtawen iti pitopulo ket lima.
Segun ken ni Dr. Talaga, kaaduan kadagiti kaso ket mild laeng iti sintomasda isu a manarimaanen iti panag-quarantine-da.
Kadagiti nakapulapolda ket maipatungpal latta iti panag-isolate da iti lima nga aldaw agingga makalawas tapno saanen nga umado iti kaso.
Nupay kasta, impasigurado na nga agtultuloy latta iti panagannadda ken araramidenda nga addang tapno saan nga umado ti kaso ket impasiguradona a nakamonitorda kaduada ti Philippine National Police para iti panangsurot iti kanayon a panagaramat iti face mask.
Agtultuloy met iti panagbakuna kontra covid-19 iti probinsia ta saanda pulos a nagsardeng iti panangipatungpal iti panagbakuna ta inaldaw-aldaw a maisyangkat ket uray weekends ket adda latta.
Inyunay-unayna nga uray nangato accomplishment iti vaccination iti probinsia ket rumbeng a salakniban ti bagi ti tunggal maysa ta adda pay iti bambamatayan ti health department nga agduduma a variants ken subvariants iti covid-19 ket pagdanaganna nga amangan nu maakaran dagiti immunocompromised ken senior citizen a vulnerable iti sakit.
