VIGAN CITY – Naipasardeng pay laeng ti panagtutupada ditoy probinsia mangrugi iti January 12 agingga 26 tapno makontrol ti umad-adu a kaso ti Covid19 nangruna idiay Cabugao ta extensive ti contacts dagiti nagpositibo.
Iti pannaki-uman ti Bombo Radyo Vigan ken ni Gov. Ryan Singson, panagsusugal dagiti tao ti maysa kadagiti rason no apay adda manen ti outbreak iti Covid19 agsipud ta agsasaruno dagiti nairekord a kaso ti nasao a sakit isu a kiddawenda nga aganus pay laeng dagiti umili.
Kabayatanna, ad-adalen ti provincial government ti sitwasyon ti Small Town Lottery ta numan bilang adda ma-trace da a positibo ket iramanda nga ipasardeng ti operasyonna.
Nakasaganada a mangipakaammo iti Philippine Amusement and Gaming Corporation (PAGCOR) ti dayta nga addang nga aramidenda agsipud ta adda pammalubos ti ahensia iti operasyon ti STL.
