Lima ti nadunor gapu iti panagdidinnungpar dagiti tallo a lugan iti national highway ti Barangay San Antonio, Narvacan, Ilocos Sur.
Ti trailer truck ket minaneho ti lalaki nga agtawen iti tallopulo ket innem, taga-Sta. Maria, Bulacan.
Ti Honda City ket minaneho ti lalaki nga agtawen iti limapulo ket lima, inluganna ti maysa a senior citizen, ken grade 11 student nga agpapada a taga-Barangay Dadalaquiten Norte, Sinait.
Ti met Kia Carnival ket minaneho ti lalaki nga agtawen iti uppat a pulo ket siam, inluganna ti maysa a babai nga agtawen iti uppat a pulo ket pito, taga-Barangay Margaay, Narvacan.
Maibasar iti imbestigasion, nakasardeng iti traffic light iti asideg ti Narvacan Farmers Market ti trailer truck ken Honda City idin ta dimteng ti Kia Carnival nga agbibiahe iti likudanda.
Saan a nadlaw ti drayber ti Kia Carnival a nakasardeng ti Honda City isu a natukbobna ti nasao a lugan.
Gapu iti kapigsa ti impact, immabante ti Honda City ket natukbobna met ti trailer truck.
Dagus a naitaray iti ospital dagiti lima a nadunor para iti naan-anay a pannakatamingda, idinto a saan a naan-ano ti drayber ken inlugan ti trailer truck.
