Nabara nga inawat ti Chinese Embassy ti posibilidad ti panagtaripnong da Presidente Ferdinand Marcos Jr ken ni Chinese Ambassador Jing Quan tapno mapagpatangan dagiti napateg ken sensitibo nga isyu iti nagbaetan ti Pilipinas ken China.
Segun iti embahada, namnamaen ni Jing ti gundaway a makapagsinnukatda iti kapanunotan iti presidente ken mapagpatangan no kasano a maliklikan a kumaro ti tension iti nagbaetan dagiti dua a pagilian.
Immunan a pinasingkedan ni Marcos ti pannakaalarmana iti imbaga ti ambassador mainaig iti posible a panagaramat ti China iti puersa kontra Pilipinas, a kunana ket kasla pangta ken saan a diplomatiko a panagsarita.
Gapu dayta, kinuna ti presidente a nasken a maaddaanda iti direkta a panagpatang tapno lawlawagan ti kayat a sawen ti imbagana.
