VIGAN CITY – Panagtalek iti Namarsua ti rason no apay a nalasatan ti asawa a nurse ti maysa nga overseas Filipino Worker a ni Edwin Tabangay Jr., dati a car racer ti sakit a COVID19 a tatta ket agpapalaingen.
Iti pannaki-uman ti Bombo Radyo Vigan kenni Tabangay, marigatanen idi nagpositibon iti COVID19 ti asawana a maysa a government nurse iti nasao a pagilian ken pati isuna ket nakarikna metten iti sintomas ti nasao a sakit ngem pinili ti asawana nga ag-self isolate agsipud ta kas maysa a nurse ket ammona no kasano iti wagas a panangtaripato kadagiti pasyente.
Gapu iti dayta, pinadasda amin a home remedies kontra iti virus ken saanda a naawanan ti namnama iti tunggal maysa a malasatan iti dayta a pagteng ti biagda ta ipagpagapuda nga ubbing pay laeng dagiti annakda.
Ingunamgunamna met a gapu ta naasideg kadakuada iti annakda ket narigat para kadakuada iti maapektaran iti COVID19 ta masapul a salwadanda met latta iti salun-at ti anakda.
Kabayatanna, pinasingkedan ni Tabangay a naglukaten dagiti napateg nga establisimento iti nasao a pagilian ken mabalin a rumuar dagiti sangkapamilyaan ket no mangayabda man kadagiti gayyemda ket rumbeng a surotenda ti social distancing.
