Inlawlawag ti Philippine Coast Guard (PCG) a saanda a nag-withdraw idiay Escoda Shoal, a pagaammo met kas Sabina Shoal, no di ket repositioned laeng ti BRP Teresa Magbanua nga agsubli idiay Palawan gapu iti saan a nasayaat a paniempo ken naibus ti suplay.
Segun ken ni PCG Commandant Admiral Ronnie Gil Gavan, saan a nag-withdraw dagiti puersa ti Pilipinas iti Escoda Shoal, nga adda iti uneg ti 200-nautical mile exclusive economic zone (EEZ) ti pagilian babaen ti 1982 United Nations Convention on the Law of the Sea.
Ti BRP Teresa Magbanua (MRRV-9701), ket agsubli manipud Sabina wenno Escoda Shoal kalpasan ti lima a bulan.
Ti barko, maysa kadagiti kadakkelan a barko ti PCG, ket adda ti structural damage-na idi inggagara dagiti barko ti China Coast Guard a dungparen idi Agosto 31.
