VIGAN CITY – Nakasagana nga umapela idiay Korte Suprema ti National Union of Students of the Philippines (NUSP) inaig iti panangaprubar ti Commission on Elections (Comelec) iti nominasyon ni dati a National Youth Commission (NYC) chairperson Ronald Cardema kas mangibagi ti Duterte Youth Partylist idiay Kamara para ti 18th Congress.
Ti pannaki-uman ti Bombo Radyo Vigan ken ni NUSP secretary-general Raoul Manuel, ibilang na a historic wennu nakalalagip iti pakasaritaan iti pagilian ti desisyon ti Comelec ta nalawag a saan nga usto iti ar-aramiden ni Cardema ngem kinanunungan da pay.
Malaksid iti petisyon idiay Korte Suprema, nakasagana pay iti counterpart ti NUSP idiay Kamara a mangipila iti petisyon idiay Kongreso nu maiproklamar ti dati a NYC chairperson kas partylist representative.
Kabayatanna, babaen iti mensahe nga inpatulod ni Comelec Commissioner Rowena Guanzon, inpatangken na nga awan iti agtugaw a representative ti Duterte Youth agingga a saan a masolbar iti disqualification case a naipila kontra ken ni Cardema.
