VIGAN CITY – Addan ti person of interest nga im-imbestigaran itatta ti Sta. Lucia municipal police station inaig iti napasamak a mapapati a panagtakawan iti uneg ti Lakas Agri Tech Marketing a kukua ni Christine Ang Ochavillo nga agtawen iti uppat a pulo ket pito a taga- Dagupan City, Pangasinan idiay Barangay Catayagan, Sta. Lucia idi July 13.
Segun ken ni Police Captain Nilo Ancheta, hepe ti St.a Lucia PNP, idi inimbestigaran da iti lugar a nakapasamakan iti mapapati a panagtakawan, nakita da a saan a napuwersa a nalukatan iti drawer a nakaikabilan ti napukaw a berde a pouch a naglaon iti dua gasut ket lima pulo ribo a pisos a naglakoan ti caretaker a ni Robert Caritativo.
Malaksid iti dayta, nakita pay dagiti otoridad nga awan iti force entry a posible a simrekan kuma dagiti saan pay nabigbig a suspek a nagtatakaw iti uneg ti pasdek.
Maibasar iti inisyal nga imbestigasyon, siguden nga agibatbati ni Caritativo iti naglakoan na iti drawer ngem idi laeng kalman a napukaw.
Kinuna ni Ancheta a naamuan da a malaksid ti caretaker ken ti kadua na pay nga stay-in helper ket adda dagiti delivery boy a napan naturog idi rabii sakbay a naamuan ti caretaker a napukaw iti naglakoan na.
