VIGAN CITY – Kayat ni Gov. Ryan Singson nga adda iti napintas a pagbanagan iti imbestigasyon a maisaysayangkat inaig iti napasamak a panagtakawan idiay 2 Brother’s Grocery idi December 26.
Segun ken ni Gov. Singson, masapul a maamwan no siasino dagiti armado a lallaki a nangserrek iti nasao a pagtagilakuan kas makita iti CCTV footage ken kasta payen dagiti dua a kaduada a maibilang a kas lookout-da, pakairamananen iti tignay nga inaramid ti kapulisan inaig iti nasao a banag.
Innayon na a babaen iti manarimaan nga imbestigasyon ket maamuan nu siasino dagiti nagkurang ken masapul a maipakat kadakuada iti kaibatugan a pannusa iti panagliway da.
Ti napasamak ket agserbi a kas ballaag kadagiti dadduma pay a negosyante tapno agannadda kadagiti negosyo da tapnu saanen a maulit iti napasamak.
Kiddawen ti gobernador ti pannakitinnulong dagiti nadumaduma nga ahensia iti siudad pakairmanan dagiti gwardya iti nasao a pagtagilakuan ta kayat na a naal-alisto iti pannakarisut ti nasao a krimen.
