VIGAN CITY – Addan iti makitkita ti Bantay municipal police station a persons of interest iti napasamak a motor-napping idiay Zone 3, Bantay idi December 16.
Segun ken ni Police Major Nolly Salleng, hepe ti Bantay PNP, addan iti atapen ti biktima a ni Sherwin Sanchez nga agtawen ti dua pulo ket lima, baro nga agnaed idiay Barangay Cabusligan, Bantay nu siasino iti posible a nangtakaw iti motorsiklo na ngem saan da pay laeng nga inbuksilan iti kinatao na tapnu saan a maapektaran iti imbestigasyon.
Maibasar iti CCTV footage a naala ti Zone 3, nakita no kasano a simrek ken rimuar dagiti suspek iti nangalaanda iti motorsiklo ngem awan met iti sabali CCTV a mabalin a pakakitaan nu siasino dagiti suspek ta saan unay a malasin ngem mapapati a babai ti nagmaneho iti natakaw a motorsiklo.
Idi December 15 iti alas dies iti rabii ket napan inparking ni Sanchez ti motorsiklona iti ruar iti ab-abangan na a pagtaengan idiay Zone 3, Bantay ket idi agsapa ti December 16, mapukpukawen ti motorsiklo na.
