VIGAN CITY – Kaso a theft ti sangwen ni Randy Poli, agtawen iti uppat a pulo ket pito, mannalon a taga-Sitio Rebba, Barangay Cacadiran, Cabugao ken dagiti dua a kaduana a saanen a nainaganan gapu ti panagtakawda iti kayo ti mahogany.
Ti biktma ket ni Emerson Tabilas, agtawen iti uppat a pulo, mannalon a taga-Sitio Kadangraan, Barangay Cacandongan, San Juan.
Iti imbestigasyon dagiti pannakabagi ti linteg, alas nuebe iti agsapa ti September 4, napan ti biktima idiay Sitio Naguludan tapno kitaen ti kayo iti mahogany idin ta nadlawna nga innem a round logs ti mapukpukaw ken saanna a masarakan.
Segun ken ni Barangay Kagawad Joseph Vallangca, agtawen iti uppat a pulo ket tallo ken residente iti Sitio Naguludan, Barangay Darao ken ni Warlito Baldovino, a taga-Barangay Cacandongan nga iti alas dos iti malem idi September 2, nakitada ti suspek ken ti dua a saanen a nabigbig a kaduana a nagtitinnulong a nangilugan iti tallo a kayo ti mahogany iti kurong-kurong nga awan plakana.
Iti alas tres ti malem ti isu met laeng nga aldaw, nagsublida manen usar ti motorsikloda a nangilugan iti tallo a kayo ti mahogany tree nga aggatad amin iti sangapulo ket dua a ribo a pisos.
