VIGAN CITY – Panagtakaw iti makitkita a rason dagiti kameng ti Lidlida Municipal Police Station iti napasamak a pammaltog idiay Brgy. Poblacion Norte.
Nabigbig ti biktima a ni Mark Anthony Sayaan agtawen tallo pulo ket pito, mannalon agnaed ti nasao a barangay.
Iti pannaki-uman ti Bombo Radyo Vigan kenni PLt. Medward Galay, hepe ti Lidlidda Municipal Police Station, pattienna a plinano a nalaing dagiti suspek ti pasamak ta gimmatangda nga immuna ti dua a botelya ti arak ken nagpammarangda a kameng ti INTEL ken mangsapsapol ti drug lord ti lugar.
Sinerrek dagiti dua ti tienda ken pinaturunganda ti paltog ni Liberty Sayaan ket kellaat a rimmuar manipod ti maysa a ruangan ni Mark Anthony ta ammuanna no ania iti mapaspasmak ngem iso iti pinaltogan ti suspek.
Innala dagiti dua a suspek ti kwarta a pito ribo a pisos ken alahas nga aggatad ti pito pulo ket uppat a ribo a pisos ken dua a cellphone nga aggatad ti sangapulo ket walo a ribo a pisos.
Naipan ni Sayaan idiay Candon General Hospital ngem naideklara a dead on arrival.
