VIGAN CITY – Panagsubad iti rigrigat dagiti nagannakna a nangpaadal ti tartarigagayan ita ni Engr. Raylyn De Guzman Cachola, Board Passer iti Engineering Licensure Examination ken nagturpos iti University of Northern Philippines ta kayatnan ti agsapul iti trabaho kalpasan a naipasanan ti eksam.
Iti pannaki-uman ti Bombo Radyo Vigan ken ni Cachola, narigat para kenkuana ti agbalin a maysa nga engineer nangruna ta adda pagkapuyanna iti Mathematics ngem babaen ti panangsurotna met iti imbalakad kadakuada iti Review Center nga agtalek iti naadal ken iti bagi ket napagballigianna met ti exam.
Ti preparasyonna iti panageksam ti maibilangna a karigatan a paset ti panagbalinna a board passer ta adu a gundaway a na-delay ti eksam ket mayatiddug ti panawenda nga ag-review isu nga adu a bambannug ken rigrigatda.
Palalo a ragsak ti nariknada a sangapamilia idi nakitana ti naipatulod kenkuana a screenshot ti listaan dagiti nakapasa ket adda ti naganda.
Binalakadan met Engr. Cachola dagiti future engineer a numan pay narigat ti kurso a napilida ket kabaelanda met nga ilasat babaen ti pammati iti Dios ken panagtalek iti bagi.
