Awan ti nadangran iti panagsinnagid dagiti dua a lugan iti national highway ti Barangay Sulvec, Narvacan, Ilocos Sur.
Nabigbig ti nagmaneho iti Hyundai H-100 a ni Rodrigo Bruno Mejia Jr., agtawen iti tallopulo ket siam, courier driver ti Flash Express, taga-San Vicente, Alcala, Pangasinan.
Ti met nagmaneho iti white Mitsubishi L300 van ket ni Romeo Martin Roque, agtawen iti limapulo ket innem, taga-Balagtas, Bulacan.
Agpapa-abagatan ti Hyundai H-100 idin ta agpa-amianan met ti Mitsubishi L-300 van ket idi magtengda ti nakapasamakan ti insidente, kangrunaan iti kurbada a paset ti kalsada, napan ti L-300 van iti bangir a linya ket nasagidna ti akin-kannigid a paset ti Hyundai H-100.
Gapu dayta, agpada nga adda dadael dagiti dua a lugan idinto a dagiti drayber ken pasahero ket saan a nadangran.
