VIGAN CITY – Adu ti nasdaaw iti panagruar ti danum iti maysa a jetmatic pump idiay Panay, Magsingal, Ilocos Sur nga ibilangda a milagro gapu ta awan met ti mangbombomba.
Segun ken ni Alvin Aglibut, idi kalman a nangrugi nga agruar ti danum manipud iti bomba uray awan met ti mangbombomba.
Kunana a naidumduma daytoy ta iti las ud ti tallo a tawen a panagserbina iti kapilya, ita laeng a makapadas ti kastoy ken balawenna pay nga El Nino ita ngem adu ti agruar a danum iti jetmatic pump a nabayagen a saan a maus-usar ta nalibeg ken maan-anay ngem idi kalman ket naliknaw, nadalus nga arigna mabalin pay a mainom ti langa ti danum nga agruar.
Patienna nga adda grasya nga ipaayna daytoy a pasamak ta adda dagiti tattao a nangibaga a limmag-an ti riknada idi makainomda iti daytoy a danum.
Maysa kadagiti nagturong iti lugar ni Brgy Captain Reynaldo Riduque a taga-Pantay, Vigan City ta kayatna a mapaneknekan iti kinaagpayso ti nasao a banag.
Segun ken ni Riduque, numan pay saanda a nadanun ti panagruar ti danum ti bomba ket patienda nga adda milagro a napasamak.
Malaksid ken ni Riduque, maysa pay ni Wilberto Tabutol kadagiti limmag-an ti riknana agsipud ta nakunana a kadagiti naglabas nga aldaw ket adda dagiti madi a marikriknana ngem idi imminom, nadlawna a simmayaat ti riknana.
Pinasingkedanna a ti nasao a jetmatic pump ket nabayagen a saan a naus-usar ngem naklaatda idi nadalus ken naliknaw ti iruarna a danum.
