VIGAN CITY – Impalubos ni Gov. Ryan Singson ti operasyon dagiti pampubliko a transportasyon uray pay naisakup dagiti dadduma nga ili iti ditoy probinsia iti Modified Enhanced Community Quarantine manipud idi April 7 agingga inton April 21.
Iti pannaki-uman ti Bombo Radyo Vigan ken ni Gov. Singson, maiparit koma ti public transportation iti salinong ti MECQ ngem ikonsidera ti provincial government ta masapul laeng a sumurotda kadagiti health protocol a bilin dagiti Local Government Unit.
Malaksid ti dayta, kiddawenna a maibabbaba koma ti capacity na dagiti lugan tapno maliklikan ti panagadu ti kaso ti Covid19.
Kabayatanna, iti panagraira dagiti Covid19 cases iti tunggal ili ket kiniddaw ti gobernador a mabantayan dagiti innem nga ili nga agtaltalinaed a Covid19 free a pakairamanan ti ili a Nagbukel, Quirino, Galimuyod, San Ildefonso, Sigay, ken Magsingal.
