VIGAN CITY – Kiniddaw ti Sto. Domingo Police Station ti kooperasyon dagiti umili a sumurot iti pannakaiparit ti agparking iti igid ti kalsada kalpasan a nagpatulong kadakuada ti Department of Interior and Local Government.
Iti pannaki-uman ti Bombp Radyo Vigan ken ni PLT. John John Garan ti Sto. Domingo Police Station, ti pannakaiparit ti nasao a banag ket kas panagsagsaganada iti road clearing validation ken tapno maliklikan ti aksidente iti kalsada.
Saan laeng a kadagiti highway ti pakaipatungpalan ti nasao nga addang no di ket kadagiti barangay isu a dagiti lugar a nailet ti kalsadana ket mabalinda nga ipatang iti kapitan nga aramatenda ti barangay hall a nalawlawa laeng a pagparkingan tapno naur-urnos met laeng dagiti lugan.
No iti met tiendaan ti Sto. Domingo ket madaman ti plano ti engineering sector no kasano ti panagparking dagiti lugan agsipud ta adda manamnama nga ilatang ti Local Government Unit-SDO a parking area.
Nupay kasta, impakaasina kadagiti drayber a rumbeng a sumurotda iti linteg-trapiko tapno awan ti maisagmak.
