VIGAN CITY – Inallukoy ni Governor Ryan Singson nga agparehistron babaen iti online iti vaccination rollout babaen iti register.ilocossur.gov.ph tapno maawat ti libre a bakuna kontra Covid19.
Iti pannaki-uman ti Bombo Radyo Vigan ken ni Singson, 10,707 doses ti Sinovac ti naawaten ti probinsia manipud ti national government ken 2,330 ti Astrazeneca idinto a mayur-uray ti 8-9k doses a sumangpet manipud ti Sinovac a maibakuna kadagiti nabatbati a health workers ken senior citizens.
85 percent kadagiti A1 priority group ti nabakunaanen ket impanakkel ti gobernador a naurnos ti sistema ti vaccination rollout ditoy probinsia ken mabalinen nga agpabakuna dagiti local chief executives pakairamanan dagiti Barangay Health Emergency Response Team.
Kabayatanna, madelay ti panagsangpet ti bakuna a ginatang ti Ilocos Sur Provincial Government iti India gapu ti nakaro a sitwasyon ti Covid iti nasao a pagilian.
