Naragsak nga inawat ni Presidente Ferdinand Marcos Jr ti pammigbig ti World Bank iti Pilipinas kas Upper-Middle Income Country.
Segun iti presidente, pammaneknek daytoy a nagbungan dagiti reporma a pang-ekonomia ti gobierno ken agtaltalinaed a natibker ti ekonomia ti pagilian iti baet dagiti nainlubongan a karit.
Innayon ni Marcos a manamnama daytoy a mangipangato iti talek dagiti agpuunan, a mabalin a mangidalan iti ad-adu a negosio, trabaho, ken gundaway para kadagiti Pilipino.
Impaganetget pay ti presidente a ti pudno a kinapateg ti panagdur-as ket marukod iti panangpasayaat iti biag ti kada Pilipino ken saan laeng a kadagiti datos ti ekonomia.
Maibasar iti kaudian nga income assessment ti World Bank, umabot iti 4,850 US dollars ti national income per capita ti pagilian, nangatngato iti 4,636 US dollars a naituding a threshold tapno mairaman iti hanay dagiti Upper-Middle-Income Countries.
