Kitkitaen ti Department of Health (DOH) iti posibilidad nga ingato ti premium contribution ti PhilHealth para kadagiti indibidual nga aglablabsing kadagiti linteg iti kinatalged kas kadagiti nagannak dagiti menor de edad a madangran gapu ti firecracker ken saan a sumursurot iti linteg trapiko.
Segun ken ni Assistant Secretary Albert Domingo nga spokesperson iti DOH, ti panagbaliw ti pagannurotan ket agserbi a deterrent tapno saan a baybay-an dagiti nagannak dagiti annak nga agaramat ti firecracker ken allukoyen dagiti aglablabsing ti linteg trapiko a sumurot kadagiti pagannurotan iti kalsada.
Pinasingkedan ti opisyal ti DOH ti 1,113 nga aksidente iti kalsada a nairekord manipod December 21, 2025 agingga January 2, 2026 a masansan a rason dagiti saan a sumursurot a rider a saan a nakasuot ti helment wenno nabartek.
Ti nasao a bilang ket 82% a nangatngato ngem iti nairekord iti isu met la a panawen idi napan a tawen.
Inlawlawag ni Domingo nga agtultuloy iti panangbayad ti PhilHealth dagiti gastos iti biktima kangrunaan kadagiti ospital ti DOH ta adda ti zero-balance billing aniaman iti rason ti sinagrapda.
