VIGAN CITY – Impasigurado ni Vigan City Mayor Juan Carlo Medina a nakasaganan ti siudad iti panaglukat ti turismo inton November 15 tapno maibangon ti ekonomia a nalugi gapu iti Covid19 pandemic.
Iti pannaki-uman ti Bombo Radyo Vigan ken ni Mayor Medina, nakitinnulagdan kadagiti tour agency, hotels ken restaurants para iti naan-anay a panagsaganada kadagiti agsangpet a turista idinto a nabagaanen dagiti tour guide a mangkuyog kadagiti turista.
Numan pay mailukaten ti turismo ti probinsia iti publiko ket malimitaran laeng ti limapulo iti inaldaw dagiti makastrek ta masapul nga adda ti travel agency para iti booking, hotel a pagtalinaedanda, tour guide a mangtarabay iti panagpasiarda kadagiti lugar a nailanad laeng iti travel itinerary nga iggemda.
Inkari ti mayor nga ikagumaanda nga ikkan iti trabaho dagiti negosyante a naawanan ti pagsapulan manipud idi naipasardeng dagiti negosyoda gapu iti Covid19 pandemic.
