VIGAN CITY – Manamnama nga inton Marso iti sumaruno a tawen pay laeng a malukatan dagiti hotel idiay Malta kas pinasingkedan ni Bombo International Correspondent Glenda Laurente iti pannaki-uman kenkuana ti Bombo Radyo Vigan.
Segun ken ni Laurente, dayta ket kas addang ti nasao a pagilian a maliklikan iti COVID19 no man pay simmayaat metten ti kasasaadda ta idi May 4 ket naipasublin dagiti trabaho, nalukatanen dagiti dadduma a pagtagilakuan ken adun dagiti tao a makita iti aglawlaw.
Kabayatanna, nanayunan ti muelta dagiti aglabsing kadagiti pagannurotan a naipatungpal ta tatta ket umaboten ti nasurok uppat a ribo a euro.
Iti agdama, lima laeng iti natay idiay Malta a dayta ket gapu iti nasayaat a panagtignay ti gobiernoda tapno malabanan iti nasao a sakit ken nadisiplina dagiti agindeg.
