VIGAN CITY – Kimmapsut ita a tawen ti panagilako dagiti seller ti ebike idiay Metro manila kagiddan ti panangiparit ti gobierno nga agdalyasat dagiti nasao a klase ti lugan iti national road.
Iti pannaki-uman ti Bombo Radyo Vigan ken ni Ryna Mata, Ebike owner ken seller idiay Quezon City, sipud pay idi napan a tawen a kimmapsot ti panagilakoda iti e -bike gapu kadagiti agruar a baro a brand ken ti nalaka a presyo a pannakailakona iti merkado ngem ad-adda ita a tawen gapu iti baro a pagannurotan nga impatungpal ti gobierno.
Anamonganna ti panangpainget ti pagannurotan inaig iti panagaramat iti e-bike ken ti singasing a maadaan ti driver’s license dagiti ebike owner gapu ta adu dagiti ubbing nga agmanmaneho ken aglablabsing iti linteg trapiko.
Nupay kasta, kinuna ni Mata nga aniaman a linteg nga ipatungpal ti gobierno ket nakasaganada a sumurot ngem singasingda a saan a maiparit wenno mapukaw ti panagaramat kadagiti ebikes ta ad-adda daytoy a makatulong iti aglawlaw kontra polusyon.
Kiddawna met kadagiti ebike user nga agbalin a responsable a drayber.
