VIGAN CITY – Maipalubosen inton bigat (August 22) ti panagkalubbon iti motorsiklo kas pinasingkedan ni Vigan City Mayor Juan Carlo Medina ita a maidalanen ti siudad iti modified general community quaramtine.
Iti pannaki-uman ti Bombo Radyo Vigan ken ni Medina, uray saan nga agkabbalay ket mapalubosanen nga agkalubbon ngem kasapulan nga agaramatda ti facemask ken helmet para iti kinatalgedda.
Inlawlawag ni Medina a saan a kas kadagiti lugar a naidalan iti general community quarantine ti kainget ti lokal a gobierno ti Vigan City isu a sipapalubosda a mangipatungpal ti nasao a paglintegan nga immunan a kiniddaw dagiti umili a saan a maiparit agsipud ta isu ti kangrunaan a wagas ti transportasyon ita a narikut pay laeng ti sasaaden dagiti sabali a pampubliko a transportasyon.
Kabayatanna, malukatanen dagiti barbershop ken maipalubosen ti dine in service kadagiti panganan ngem malimitaran laeng iti limapulo a porsiento ti maakomodar a kustomer.
Dagiti met locally stranded individual ken returning overseas Filipinos ket kasapulanen a dumalan iti swab test iti walo agingga sangapulo nga aldaw sakbay iti panagawidda ditoy siudad ken agquarantine da iti uneg ti pagtaenganda.
