VIGAN CITY – Inwaragawag ni Vice Governor Ryan Singson ti pannakaisanud pay laeng ti ceremonial distribution wenno ti panagiwaras iti farm equipments kadagiti mannalon iti probinsia.
Iti pannaki-uman ti Bombo Radyo Vigan ken ni Singson, idi kalman ket naiwarasda kadagiti Federated Farmers Association ken dadduma pay nga Association of Farmers iti probinsia dagiti farm equipment.
Naiwaras kadagiti Association of Farmers ti maysa a unit ti ripper, maysa a unit ti grass cutter ken sangapulo a rolyo ti chemical hose idinto a naited met kadagiti Federated Farmers Association dagiti kiniddawda a tractor, harvester, water pump ken agriculture hose nga amin ket nagtaud iti pondo ti RA 7171.
Inyunay-unay ni Vice Gov. Singson kadagiti mannalon nga agrehistroda kadagiti asosasyonda tapno mairamanda kadagiti mawarasan ta dagiti maipapaayan ket kas maibasar iti listaan ti Provincial Agriculture Office.
Malaksid dayta, binlakadan ti bise gobernador dagiti mannalon nga urayenda ti pakdaar no kaano manen ti naituding nga aldaw ti panagiwarasan iti maikadua a batch dagiti farm equipment.
