VIGAN CITY – Nagpanawagan ti ACT Teachers Partylist iti kongreso a matignayan ti resolusyon nga impilada a mangkidkiddaw iti pannakaimbestigar kadagiti ginasgastos ti Department of Education tapno makita no napanan ti pondo ti ahensia iti naglabas a dua a tawen.
Dayta ket kalpasan ti pannakadismaya ti grupo iti panaggatang ti DepEd iti PHP2.4-B a gatad ti outdated wenno low quality laptops para kadagiti mangisursuro.
Iti exclusive interview ti Bombo Radyo Vigan ken ni Secretary General Raymond Basilio, nakas-ang daytoy kadagiti mangisursuro agsipud ta nakaron iti panagib-ibturda ken pannakaipaidam ti husto a benepisyo kadakuada.
Binibig pay ni Basilio nga iti kallabes ket dagiti pay mangisursuro ti naibaon nga agsolicit iti bond paper, printer ken ink ngem makita met ita ti panaggasto ti DepEd iti dakkel a gatad para kadagiti laptop a saanda met a maaramat a nasayaat iti inda panagtrabaho gapu ti nababa a kalidadna.
Innayon ti opisial a dakkel a karit iti panagtakem ni Vice President ken Education Secretary Sara Duterte no kasanona nga ipakita a nadalus ti panagserbina babaen ti pannakadusa dagiti nainaig iti panaggatang kadagiti nangina a laptop nga isu ti kalikagum ita ti grupo.
